Biantara Paturay Tineung

Assalamualaaikum wr.wb.

          Puji sinareng syukur kasanggakeun ka Gusti nu Maha Suci. Alhamdulillah dina denget ieu urang sadaya tiasa riung mungpulung dina raraga nyakseni upicara Paturay Tineung, wireh sim kuring saparakanca bade ngantunkeun ieu sakola sabada tamat diajar tilu taun.

Bapa kalih Ibu, hadirin sadaya anu dipihormat.

          Sim kuring ngadeg di ieu tempat minangka wawakil ti rerencangan kelas tilu, hoyong cumarios ngedalkeun kareteg angan.

          Mungguh ari waktu asa nyeak pisan sajorelak. Asa kamari keneh sim kuring saparakanca munggaran lebet ka ieu sakola, ayeuna tos kedah paturay deui. Sim kuring saparakanca kedah deui neraskeun sakola, ngahontal harepan sareng cita-cita.

          Kantenan bae salami tilu taun diajar di ieu sakola, seueur pisan anu bakal janten panineungan. Di ruang-riung boh di kelas boh dina rupa-rupa kagiatan bari sakapeng sempal guyon gogonjakan sareng rerencangan. Tangtos bae eta sadayana bakal jadi kenangan nu moal kahilapkeun. Atuh kasaean Bapa kalih Ibu guru sadayana, elmu pangaweruhna anu didugikeun ka sim kuring saparakanca, tangtos bakal nyerep dina angen, janten obor nu nyaangan jalan sorangeun. Kalayan diaping dididik ku Ibu Bapa guru pisan sim kuring saparakanca gaduh elmu nu mangpaat. Dituduhkeun nu sae sareng nu awon, nu leres sareng nu lepat, nu poek sareng nu caang.

          Teu aya nu tiasa kapisanggem, iwal ti hatur semu nuhun kana pirang-pirang kasaean Ibu kalih Bapa guru sadayana. Sim kuring saparakanca teu tiasa males eta kasaean, anging ngedalkeun du’a, pamugi rupining elmu parantos dipaparinkeun, kenging ganjaran nu ageng mangtikel-tikel ti Gusti nu Maha Suci.

          Atuh salami sim kuring saparakanca diajar di ieu sakola, kantenan bae seueur kalepatan. Seueur pisan sikep sareng nyuhunkeun di hapunteun tina samudaya kalepatan kaluluputan. Pamungkas smi kuring saparakanca nyuhunkeun pidu’s ti Ibu kalih Bapa guru sadayana, pamugi sadaya alumni nu lulus taun ieu tiasa neraskeun sakola. Lungsur-langsar teu aya halangan-harungan, nyukeruk elmu di tingkat nu langkung luhur.

Meser kaos dimeteran,

Meser sandal sareng pita,

Abdi mios rek pamitan,

Rek ngahontal cita-cita.

Kamari mawa ragaji,

Ayeuna rek mawa kisa,

Kamari urang ngahiji,

Ayeuna urang papisah.

Rupina sakitu nu kapihatur. Hapunteun bilih aya basa nu kirang merenah larapna, bilih aya kalimah nu teu raos kana manah.

Wabillahi taufik walhidayah. Wassalamu’alaikum wr.wb.